jump to navigation

សាលា​ក្រុង​ភ្នំពេញ​ប្រារព្ធ​ពិធី​សម្ពោធ​កន្លែង​បូជនីយដ្ឋាន​សម្ដេច​ព្រះសង្ឃរាជ ជួន ណាត និង​ព្រះ​ភិរម្យ​ភាសា​អ៊ូ ហៅ​ង៉ុយ ខែ​កុម្ភៈ 22, 2008

Posted by សុភ័ក្ត្រ in ព័ត៌មាន.
1 comment so far

 
លោក​អភិបាល​ក្រុង​ថត​រូប​អនុស្សាវរីយ៍​ជាមួយ​មន្ត្រី​នៅ​មុខ​រូប​សំណាក ព្រះភិរម្យ​ភាសា​អ៊ូ ហៅ​ង៉ុយ

រាជ​ធានី​ភ្នំពេញ៖ បូជនីយដ្ឋាន​រូប​សំណាក​សម្ដេច​ព្រះសង្ឃរាជ ជួន ណាត និង​អ្នក​ព្រះភិរម្យ​ភាសា​អ៊ូ ហៅ​ង៉ុយ ដែល​សាលា​ក្រុង​ភ្នំពេញ​ក្រោម​គំនិត​ផ្ដួចផ្ដើម​របស់​លោក កែប ជុតិមា ជា​អភិបាល​ក្រុង បាន​កសាង​តាំង​ពី​ថ្ងៃ​ទី​២៨ កញ្ញា ២០០៦ ត្រូវ​បាន​ស្ថាបនា​រួចរាល់​នៅ​ថ្ងៃ​ទី​១៥ កុម្ភៈ ២០០៨ និង​សម្ពោធ​គោរព​បូជា​ជា​ផ្លូវ​ការ​ក្នុង​ពេល​នេះ។ ពិធី​ក្រុង​ពាលី​តាម​ប្រពៃណី​ព្រះពុទ្ធសាសនា ត្រូវ​បាន​ប្រារព្ធ​ធ្វើ​កាល​ពី​ល្ងាច​ថ្ងៃ​ទី​២០ កុម្ភៈ ២០០៨ និង​កាត់​ខ្សែ​បូ​សម្ពោធ​ដាក់​ឲ្យ​គោរព​បូជា​ជា​ផ្លូវ​ការ​នា​ព្រឹក​ថ្ងៃ​ទី​២១ កុម្ភៈ ក្រោម​អធិបតីភាព​លោក កែប ជុតិមា អភិបាល​រាជធានី​ភ្នំពេញ តំណាង​សម្ដេច​ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ដោយ​មាន​ការ​យាង​ចូលរួម​ពី​សម្ដេច​ព្រះមហាសុមេធាធិបតី នន្ទ ង៉ែត ព្រះសង្ឃ​នាយក​នៃ​ព្រះរាជាណាចក្រ​កម្ពុជា ព្រះសង្ឃ​ចំនួន​១១៧​អង្គ លោក​ឧកញ៉ា លោក​ជំទាវ មន្ត្រី​រាជការ ក្រោម​ឱវាទ​សាលា​ក្រុង ដូនជី តាជី និង​ប្រជា​ពលរដ្ឋ​ប្រមាណ​៣ពាន់​នាក់។


រូប​សំណាក​សម្ដេច​ព្រះសង្ឃរាជ ជួន ណាត ជា​កន្លែង​បូជនីយដ្ឋាន (រូបថត សុភ័ក្ត្រ)

លោក​មុំ សុទ្ធ ប្រធាន​មន្ទីរ​វប្បធម៌ និង​វិចិត្រ​សិល្បៈ​រាជធានី​ភ្នំពេញ​បាន​ឲ្យ​ដឹង​ថា ផ្ដើម​ចេញ​ពី​គំនិត​ផ្ដួចផ្ដើម​របស់​លោក កែប ជុតិមា អភិបាល​រាជធានី​ភ្នំពេញ និង​បាន​ការ​អនុញ្ញាត​ពី​សម្ដេច​តេជោ ហ៊ុន សែន នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា ថ្ងៃ​នេះ​សាលា​ក្រុង​ភ្នំពេញ​មាន​មោទនភាព និង​កិត្តិយស​ដ៏​ឧត្ដុង​ឧត្ដម​បំផុត ដោយ​បាន​ប្រារព្ធ​ពិធី​សម្ពោធ​នូវ​រូប​សំណាក​បូជនីយដ្ឋាន​សម្ដេច​ព្រះសង្ឃរាជ ជួន ណាត និង​បូជនីយដ្ឋាន​អ្នក​ព្រះ​ភិរម្យ​ភាសា​អ៊ូ ហៅ​ង៉ុយ ដើម្បី​ទុក​ជា​និមិត្ត​រូប​ក្នុង​ការ​គោរព​បូជា និង​ដឹង​គុណ​នូវ​វីរភាព និង​គុណូបការៈ​របស់​លោក​ទាំង​ពីរ ដែល​ជា​បុព្វ​បុរស​អ្នក​ប្រាជ្ញ​កវី​បណ្ឌិត​តែង​និពន្ធ​អក្សរសាស្ត្រ​អក្សរសិល្ប៍ នៃ​ប្រជាជាតិ​ខ្មែរ​យើង​នា​សម័យ​កាល​ទសវត្ស​ទី​១៨ និង​១៩ កន្លង​ទៅ​នេះ។

ចំពោះ​ជីវប្រវត្តិ​សង្ខេប​របស់​សម្ដេច​ព្រះសង្ឃរាជ ជួន ណាត ត្រូវ​បាន​លោក​មុំ សុទ្ធ លើក​ឡើង​ដែល​យើង​សូម​ធ្វើ​ការ​សង្ខេប​ត្រួស​ៗ​ថា សម្ដេច​ព្រះសង្ឃរាជ ជួន ណាត ទ្រង់​ប្រសូត​នៅ​ថ្ងៃ​អង្គារ ១១​រោច ខែ​ផល្គុន ឆ្នាំ​វក ត្រូវ​នឹង​ថ្ងៃ​ទី​១១ មីនា ១៨៨៣ នៅ​ភូមិ​កំរៀង ឃុំ​រកាកោះ ស្រុក​គង​ពិសី ខេត្ត​កំពង់​ស្ពឺ ក្នុង​គ្រួសារ​កសិករ។ បិតា​នាម​ព្រហ្ម ជួន មាតា​នាម​យក់ មាន​បុត្រ​តែ​ពីរ​នាក់​សុទ្ធ​តែ​ប្រុស ដែល​កូន​ច្បង​គឺ​សម្ដេច​ព្រះសង្ឃ​រាជ ជួន ណាត ឯ​កូន​ប្អូន​គឺ​លោក​អ្នក​ឧកញ៉ា ជួន នុត។ ព្រះអង្គ​បាន​បួស​រៀន​ជា​សាមណេរ​នៅ​វត្ត​ពោធិព្រឹក្ស ហៅ​វត្ត​ពោធិល្យំ លុះ​បួស​រៀន​បាន​ពីរ​វស្សា​ដោយ​ព្រះអង្គ​មាន​ប្រាជ្ញា​ឆ្លាត​វាងវៃ​រៀន​សូត្រ​អក្សរ​លេខ​នព្វន្ត​ចេះ​ចង​ចាំ​ពូកែ​លើស​សិស្ស​ផង​ទាំង​ពួង ព្រះ​គ្រូ​របស់​ព្រះអង្គ​ក៏​បាន​បញ្ជូន​សម្ដេច​ទៅ​សិក្សា​រៀន​សូត្រ​ព្រះ​បរិយត្តិធម៌​ពី​សំណាក់​ព្រះ​គ្រូ​ទេព សោ គង់​នៅ​វត្ត​ឧណ្ណាលោម រាជធានី​ភ្នំពេញ។ បន្ទាប់​ពី​បំពេញ​ជា​ភិក្ខុ សម្ដេច​បាន​និមន្ត​ទៅ​បំពេញ​វិជ្ជា​ខាង​ភាសា​សំស្ក្រឹត និង​អក្សរ​សិលាចារឹក​នៅ​សាលា​បារាំង​សែស​ចុង​បូព៌ា នា​ទីក្រុង​ហាណូយ ប្រទេស​វៀតណាម ហើយ​នៅ​ឆ្នាំ​១៩៦៣ សម្ដេច​ព្រះ​នរោត្ដម សីហនុ ប្រមុខ​រដ្ឋ​នៃ​ព្រះរាជាណាចក្រ​កម្ពុជា ទ្រង់​ប្រោស​ប្រទាន​ប្រគេន​ឋានៈ​ជា​សម្ដេច​ព្រះសង្ឃរាជ​ថ្នាក់​ទី​១។ សម្ដេច​ទ្រង់​ចេះ​អក្សរ និង​ភាសា​សៀម លាវ បារាំង អង់គ្លេស វៀតណាម និង​ភាសា​ផ្សេង​ៗ​មួយ​ចំនួន​ទៀត។ ស្នា​ព្រះហស្ត​របស់​ព្រះអង្គ​មាន​ស្ថាបនា និង​ចង​ក្រង​សៀវភៅ​វចនានុក្រម​ខ្មែរ​ភាគ​១ និង​ភាគ​២ កច្ចាយនូបត្ថម្ភ (វេយ្យាករណ៍​បាលី) កាព្យ​ធម៌ សុភមង្គល​កថា បថ្យាវត្ត​ជា​ភាសា​បាលី និង​ប្រែ​សម្រាប់​សូត្រ​ថ្វាយ​សុភមង្គល​សួស្ដី​ចំពោះ​ព្រះមហាក្សត្រ និង​អត្ថបទ​ផ្សេង​ៗ​ក្នុង​ទស្សនាវដ្ដី​កម្ពុជ​សុរិយា​របស់​ពុទ្ធ​សាសនបណ្ឌិត្យ។ នៅ​ថ្ងៃ​ទី​២៥ កញ្ញា ១៩៦៩ វេលា​ម៉ោង​៨ និង​២០​នាទី​យប់ ព្រះអង្គ​បាន​សោយ​ទិវង្គត​ក្នុង​ព្រះជន្ម​៨៦​ឆ្នាំ។

ដោយ​ឡែក​ជីវប្រវត្តិ​របស់​អ្នក​ព្រះភិរម្យ​ភាសា​អ៊ូ ហៅ​ង៉ុយ តាម​លោក​មុំ សុទ្ធ បាន​ឲ្យ​ដឹង​ថា អ្នក​ព្រះភិរម្យ​ភាសា​អ៊ូ មាន​ឈ្មោះ​ពេញ​ថា អ៊ុក អ៊ូ ហៅ​ង៉ុយ កើត​នៅ​ភូមិ​ព្រៃ​អណ្ដូង​ស្វាយ ឃុំ​កំបូល​ ស្រុក​ភ្នំពេញ ខេត្ត​កណ្ដាល បិតា​ឈ្មោះ​អ៊ុក ធ្វើ​មេឃុំ​កំបូល មាន​គោរមងារ​ជា “ចៅ​ពញា​ធម្មធារា”។ លោក​ជា​អ្នក​មាន​វោហារ​លែបខាយ ប្រាជ្ញា​វាងវៃ ចេះ​ចាំ​រឿងរ៉ាវ​ពី​បុរាណ​ទាំង​គតិលោក និង​គតិធម៌ ចេះ​ច្រៀង ចេះ​ភ្លេង និង​ជា​អ្នក​ចម្រៀង​ខ្សែ​ដៀវ​យ៉ាង​ចំណាន ធ្វើ​ឲ្យ​កសិករ​ឯ​ទៀត​នៅ​ក្នុង​ភូមិ​ស្រឡាញ់ ហើយ​គេ​និយម​ហៅ​លោក​ថា “ភិរម្យ​ង៉ុយ” ឬ​ក្រម​ង៉ុយ រហូត​មក។

នៅ​ក្នុង​ឱកាស​នោះ លោក កែប ជុតិមា អភិបាល​ក្រុង​ភ្នំពេញ បាន​ថ្លែង​ថា ដើម្បី​ផ្សារភ្ជាប់​នឹង​ចលនា​របស់​ប្រជាពលរដ្ឋ​ក្នុង​ការ​ចូលរួម​អភិវឌ្ឍន៍​ទីក្រុង​ភ្នំពេញ​ឲ្យ​កាន់​តែ​រីក​ចម្រើន ដែល​កំពុង​មាន​សកម្មភាព​យ៉ាង​រស់​រវើក ថ្ងៃ​នេះ​រាជធានី​ភ្នំពេញ​បាន​ប្រារព្ធ​ពិធី​អភិសេក​បូជនីយដ្ឋាន សម្ដេច​ព្រះមហាសុមេធាធិបតី ជួន ណាត ព្រះសង្ឃរាជ​ថ្នាក់​ទី​១ គណៈ​មហានិកាយ​ក្នុង​ឧទ្យាន​កណ្ដាល​ទីក្រុង​ដែល​ពុំ​ធ្លាប់​មាន​ពី​មុន​មក។ ដើម្បី​ជា​ការ​តប​ស្នង​សង​គុណ​ចំពោះ​ព្រះអង្គ​ជា​អគ្គ​មហា​បណ្ឌិត ដែល​ក្នុង​មួយ​ជីវិត​របស់​ព្រះអង្គ បាន​ចំណាយ​ព្រះកាយ​ពល និង​ព្រះ​បញ្ញាញាណ​បម្រើ​ជាតិ សាសនា ព្រះមហាក្សត្រ និង​បាន​បំពេញ​កិច្ចការ​ជា​ស្នា​ព្រះហស្ត​ខាង​អក្សរសាស្ត្រ ជា​ពិសេស​ស្នា​ព្រះហស្ត​ដែល​រំឮក​ឃើញ​រាល់​ថ្ងៃ គឺ​ព្រះរាជនិពន្ធ​បទ​នគររាជ សម្រាប់​ភ្លេង​ជាតិ​ខ្មែរ ព្រះអង្គ​បាន​បំពេញ​ភារកិច្ច​យ៉ាង​ឧត្តុង្គឧត្តម​ក្នុង​វិស័យ​ព្រះពុទ្ធ​សាសនា ទាំង​នៅ​ក្នុង និង​ក្រៅ​ប្រទេស។

លោក កែប ជុតិមា បាន​បន្ថែម​ថា ចំពោះ​ការ​ស្ថាបនា​បូជនីយដ្ឋាន​អ្នក​ព្រះភិរម្យ​ភាសា​អ៊ូ ហៅ​ង៉ុយ ក៏​ដើម្បី​តប​ស្នង​សង​គុណ​ដល់​លោក ដែល​ជា​អ្នក​មាន​វោហារ​លែបខាយ​ប្រាជ្ញា​វាងវៃ មាន​ស្នាដៃ​យ៉ាង​ធំធេង​សម្រាប់​ប្រទេស​ជាតិ​មាតុភូមិ​ផង​ដែរ៕

ស្រង់​ចេញ​ពី​កោះសន្តិភាព

Advertisements

រូប​ថត​សម្ដេច​ព្រះសង្ឃរាជ ជួន ណាត ខែ​កុម្ភៈ 14, 2008

Posted by សុភ័ក្ត្រ in រូបភាព.
3 comments

មនុស្ស​៣​ពាន់​នាក់​នឹង​ចូលរួម​អភិសេក​រូប​សំណាក​សម្ដេច​សង្ឃ​ជួន ណាត និង​អ្នក​ភិរម្យ​ភាសា​អ៊ូ ហៅ​ង៉ុយ ខែ​កុម្ភៈ 8, 2008

Posted by សុភ័ក្ត្រ in ព័ត៌មាន.
7 comments

សម្ដែង​ល្ខោន​ចាប៉ី​ដង​វែង​ទល់​ភ្លឺ​ជូន​ប្រជាជន​ទស្សនា​យប់​ថ្ងៃ​ទី​២០​កុម្ភៈ

ភ្នំពេញ៖ សាលា​ក្រុង​ភ្នំពេញ​បាន​គ្រោង​រៀបចំ​ពិធី​អភិសេក​រូប​សំណាក​សម្ដេច​ព្រះ​មហា​សុមេធាធិបតី​ជួន ណាត ព្រះសង្ឃរាជ​ថ្នាក់​ទី​១​គណៈ​មហានិកាយ និង​រូប​សំណាក និង​បូជនីយដ្ឋាន​អ្នក​ភិរម្យ​ភាសា​អ៊ូ ហៅ​ង៉ុយ រយៈ​ពេល​ពីរ​ថ្ងៃ ពី​ថ្ងៃ​ទី​២០ និង​២១ ខែ​កុម្ភៈ​ខាង​មុខ​នេះ ក្រោម​អធិបតីភាព​លោក​កែប ជុតិមា អភិបាល​រាជធានី​ភ្នំពេញ និង​លោក​ស្រី​តំណាង​ដ៏​ខ្ពង់ខ្ពស់​សម្ដេច​អគ្គមហាសេនាបតី​តេជោ ហ៊ុន សែន នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា និង​លោក​ជំទាវ ហើយ​មាន​ការ​ចូលរួមអបអរ​សាទរ​ពី​ប្រជាជន ពុទ្ធ​បរិស័ទ សិស្សានុសិស្ស និស្សិត មន្ត្រី​រាជការ​ប្រមាណ​ជាង​៣.០០០​នាក់​ផង​ដែរ។

មន្ត្រី​សាលា​ក្រុង​ភ្នំពេញ​បាន​ប្រាប់​រស្មី​កម្ពុជា​កាល​ពី​ថ្ងៃ​ទី​៧ ខែ​កុម្ភៈ​ថា​សាលា​ក្រុង​ភ្នំពេញ​នឹង​ប្រារព្ធ​ពិធី​អភិសេក​ខាង​លើ​ឲ្យ​ធំ​សម្រាប់​ឆ្នាំ​២០០៨​នេះ ហើយ​បើ​យោង​តាម​គម្រោង​សាលា​ក្រុង​គ្រោង​នេះ​នៅ​រសៀល​ថ្ងៃ​ទី​២០ ខែ​កុម្ភៈ នឹង​មាន​ធ្វើ​ពិធី​សូត្រ​មន្ត​ក្រុង​ពាលី​រូប​សំណាក​សម្ដេច​ព្រះ​មហាសុមេធាធិបតី​ជួន ណាត និង​អ្នក​ភិរម្យ​ភាសា​អ៊ូ ហៅ​ង៉ុយ។ នៅ​យប់​ថ្ងៃ​ដដែល​មាន​សម្ដែង​ល្ខោន​បាសាក់​រឿង​ព្រះ​វេស្សន្ដរ និង​ចាប៉ី​ដង​វែង​រហូត​ទល់​ភ្នឺ​ឲ្យ​ប្រជាជន​ទស្សនា​កម្សាន្ត​សប្បាយ​នៅ​ទី​លាន​ជាប់​សួន​ច្បារ​សម្ដេច​តេជោ​ហ៊ុន សែន មាត់​ទន្លេ​បាសាក់​ទៀត​ផង។

នៅ​ព្រឹក​ថ្ងៃ​ទី​២១ ខែ​កុម្ភៈ សាលា​ក្រុង​រៀប​ចំ​ពិធី​អភិសេក និង​សម្ពោធ​រូប​សំណាក​សម្ដេច​ព្រះ​មហាសុមេធាធិបតី​ជួន ណាត និង​រូប​សំណាក​អ្នក​ភិរម្យ​ភាសា​អ៊ូ ហៅ​ង៉ុយ ជា​ផ្លូវ​ការ ដោយ​មាន​ការ​ចូលរួម​ពី​មហាជន ប្រជាជន​ជាង​៣.០០០​នាក់ ព្រះសង្ឃ​១០៧​អង្គ ព្រម​ទាំង​មាន​ពិធី​រាប់​បាត្រ​បួងសួង​សុំ​សេចក្ដី​សុខ សុវត្ថិភាព សណ្ដាប់​ធ្នាប់​ល្អ​សម្រាប់​រាជធានី​ភ្នំពេញ​ផង​ដែរ។


រូប​សំណាក និង​បូជនីយដ្ឋាន​សម្ដេច​ព្រះ​មហា​សុមេធាធិបតី ជួន ណាត មិន​ទាន់​បើក​ស្បៃ​ចេញ (រូប​ថត៖ រ៉ាម៉ន)

សាលា​ក្រុង​ភ្នំពេញ​បាន​បញ្ជាក់​ថា បូជនីយដ្ឋាន​ទាំង​ពីរ​ខាង​លើ​ដែល​ដឹក​នាំ​ដោយ​លោក​កែប ជុតិមា បាន​ធ្វើ​ការ​សាងសង់​ឡើង​ក្រោម​ការ​ណែនាំ​ផ្ទាល់​ពី​សម្ដេច​តេជោ ហ៊ុន សែន កាល​ពី​ថ្ងៃ​ទី​២៨ ខែ​កញ្ញា ឆ្នាំ​២០០៦ ហើយ​គ្រោង​បញ្ចប់​នៅ​ខែ​មីនា ឆ្នាំ​២០០៨​ខាង​មុខ។ ប៉ុន្តែ​ដោយ​លោក​កែប ជុតិមា ជំរុញ​ក្រុម​អ្នក​ឯកទេស​វិស្វករ​ការ​ស្ថាបនា​បាន​រួចរាល់​មុន​គម្រោង​ដែល​គ្រោង​ទុក។

មន្ត្រី​រូប​នេះ​បាន​បញ្ជាក់​ទៀត​ថា ការ​កសាង​រូប​សំណាក និង​បូជនីយដ្ឋាន​ទាំង​ពីរ​នា​ពេល​នេះ​ជា​ការ​ផ្ដើម​គំនិត​ដោយ​លោក​កែប ជុតិមា អភិបាល​រាជធានី​ភ្នំពេញ បន្ទាប់​ពី​មាន​ការ​អនុញ្ញាត​ដ៏​ខ្ពង់ខ្ពស់​ពី​សម្ដេច​អគ្គ​មហាសេនាបតី​តេជោ​ហ៊ុន សែន ដើម្បី​ទុក​ឲ្យ​កូន​ចៅ​ខ្មែរ​ជំនាន់​នេះ និង​ជំនាន់​ក្រោយ​បាន​ស្គាល់ បាន​ឃើញ​រូប​សំណាក​របស់​អ្នក​ប្រាជ្ញ កវី​និពន្ធ​ខ្មែរ​ដ៏​ល្បីល្បាញ​មាន​កេរ្ដិ៍​ឈ្មោះ​ពេញ​ពិភព​លោក​ក្នុង​សតវត្សរ៍​ទី​២០។

អ្នក​ជំនាញ​បាន​បញ្ជាក់​ថា រូប​សំណាក​អ្នក​ប្រាជ្ញ​ខ្មែរ​ទាំង​ពីរ​ធ្វើ​អំពី​ស្ពាន់។ រូប​សំណាក និង​បូជនីយដ្ឋាន​សម្ដេច​ព្រះ​មហា​សុមេធាធិបតី​ជួន ណាត មាន​ទំហំ​១៥,២៤​ម៉ែត្រ​៤​ជ្រុង មាន​កម្ពស់​ពី​ដី​ដល់​ឆត្រ​រួត​លើ​ព្រះ​កេស​កម្ពស់​១០,៧៦​ម៉ែត្រ ហើយ​មាន​ខឿន​២ តូច​មួយ ធំ​មួយ ខឿន​តូច​ខាង​លើ​សម្រាប់​តម្កល់​រូប​សំណាក​សម្ដេច​ព្រះ​មហា​សុមេធាធិបតី​ធ្វើ​អំពី​ស្ពាន់​សម្ដេច​គង់​លើ​បល្ល័ង្ក​ស្ពាន់​ដ៏​ស្រស់​ស្អាត​មួយ ហើយ​បរិវេណ​ខាង​ក្រោម​ក្រាល​ថ្ម​បាយ​ក្រៀម​ធ្វើ​ផ្លូវ​ដើរ​៤​ទិស និង​ក្រាល​ថ្ម​ហាម​ខាង​ក្នុង ហើយ​ជុំ​វិញ​បូជនីយដ្ឋាន​ដាំ​ស្មៅ ដាំ​ផ្កា ដាក់​ភ្លើង​បំភ្លឺ។

រូប​សំណាក និង​បូជនីយដ្ឋាន​សម្ដេច​ព្រះ​មហា​សុមេធាធិបតី​ជួន ណាត តាំង​នៅ​លើ​រង្វង់​សួន​ច្បារ​សម្ដេច​តេជោ ហ៊ុន សែន ហើយ​មក​ដល់​ពេល​នេះ​កសាង​សម្ដេច​បាន​ជិត​១០០​ភាគ​រយ​ហើយ រង់​ចាំ​ថ្ងៃ​អភិសេក​តែ​ប៉ុណ្ណោះ។ រូប​សំណាក​ខាង​លើ​ស្ថិត​ក្នុង​ខណ្ឌ​ចម្ការ​មន។

ដោយ​ឡែក​រូប​សំណាក និង​បូជនីយដ្ឋាន​អ្នក​ភិរម្យ​ភាសា​អ៊ូ ហៅ​ង៉ុយ បាន​កសាង​នៅ​សួន​ច្បារ​មួយ​ខាង​មុខ​សណ្ឋាគារ​កាំបូឌីយ៉ាណា ស្ថិត​ក្នុង​ភូមិសាស្ត្រ​ខណ្ឌ​ដូនពេញ ហើយ​បាន​កសាង​ជិត​រួច​១០០​ភាគ​រយ​ផង​ដែរ​ហើយ។


រូប​សំណាក និង​បូជនីយដ្ឋាន​អ្នក​ភិរម្យ​ភាសា​អ៊ូ ហៅ​ង៉ុយ (មិន​ទាន់​បើក​ស្បៃ) (រូប​ថត៖ រ៉ាម៉ន)

រូប​សំណាក​អ្នក​ភិរម្យ​ភាសា​អ៊ូ ហៅ​ង៉ុយ សង់​ជា​រូប​អង្គុយ​កេះ​ចាប៉ី​ដង​វែង ហើយ​រូប​សំណាក​ធ្វើ​អំពី​ស្ពាន់​ដូច​គ្នា។ ការ​កសាង​រូប​សំណាក និង​បូជនីយដ្ឋាន​អ្នក​ប្រាជ្ញ និង​វីរជន​ខ្មែរ​ល្បី​នេះ ដើម្បី​ទាក់ទាញ​សមាន​ចិត្ត​ភ្ញៀវ​ជាតិ និង​អន្តរជាតិ​មក​ទស្សនា​ភ្នំពេញ​ឲ្យ​បាន​ច្រើន មាន​កន្លែង​ទស្សនា​ផង អភិវឌ្ឍន៍​ទីក្រុង​ផង​ដែរ៕ រ៉ាម៉ន

ស្រង់​ចេញ​ពី​សារព័ត៌មាន​រស្មី​កម្ពុជា លេខ​៤៥១០ ឆ្នាំ​ទី​១៦ ថ្ងៃ​សុក្រ ទី​០៨ ខែ​កុម្ភៈ ឆ្នាំ​២០០៨

អាន​អត្ថបទ​ទាក់ទង៖

សាលា​ក្រុង​ភ្នំពេញ​សាង​បូជនីយដ្ឋាន​សម្ដេច​ព្រះសង្ឃរាជ ជួន ណាត

ព្រះរាជ​ជីវ​ប្រវត្តិ​នៃ​សម្ដេច​ព្រះមហា​សុមេធាធិបតី ជួន ណាត (លេខ​ទី​៣) ខែ​កុម្ភៈ 2, 2008

Posted by សុភ័ក្ត្រ in ព្រះរាជជីវប្រវត្តិ.
3 comments

(ត​ពី​លេខ​មុន) លេខ​ទី​២ 

៧. ឋានន្តរ​បរិច្ឆេទ (កំណត់​អំពី​ឋានន្តរ)

  • ព.ស.​២៤៨៦ គ.ស.​១៩៤២ សម្ដេច​ទ្រង់​បាន​ទទួល​ឋានន្តរ ជា​ចាងហ្វាង​នៃ សាលា​បាលី​ជាន់​ខ្ពស់​ ក្រុង​ភ្នំពេញ ដែល​សព្វ​ថ្ងៃ​កែ​ប្រែ​ឈ្មោះ​ជា​ពុទ្ធិក​វិទ្យាល័យ​ព្រះ​សុរាម្រឹត។
  • ព.ស.​២៤៨៨ គ.ស.​១៩៤៤ សម្ដេច​ទ្រង់​បាន​ទទួល​តំណែង​ជា​ចៅ​អធិការ​វត្ត​ឧណ្ណាលោម។
  • ព.ស.​២៤៨៩ គ.ស.​១៩៤៥ សម្ដេច​ទ្រង់​បាន​ទទួល​នាទី​ជា​អធិបតី​នៃ​ថេរសភា គឺ​ក្រុម​ជំនុំ​ជាន់ខ្ពស់​របស់​សង្ឃ។
  • ព.ស.​២៤៩១ គ.ស.​១៩៤៧ សម្ដេច​ទ្រង់​បាន​ទទួល​នាទី​ជា​អនុ​ប្រធាន​គណៈកម្មការ​វប្បធម៌​ផ្នែក​អក្សរ ក នៃ គណៈកម្មការ​ជាតិ​ខាង​ការ​សិក្សា។
  • ព.ស.​២៤៩២ គ.ស.​១៩៤៨ សម្ដេច​ទ្រង់​បាន​ទទួល​នាទី​ជា​ប្រធាន​គណៈកម្មការ​ធម្មវិន័យ​ពិនិត្យ​ការ​ផ្សាយ​សៀវភៅ​សម្រាប់​សាលា​ធម្មវិន័យ​ក្នុង​ព្រះរាជាណាចក្រ។
  • គ.ស.​១៩៦១ រហូត​មក សម្ដេច​ទ្រង់​ប្រោស​មេត្តា​ទទួល​និមន្ត​របស់​សមាគម​អ្នក​និពន្ធ​ខ្មែរ​ធ្វើ​ជា​ព្រះប្រធាន​នៃ ការសម្ភាស​អក្សរសាស្ត្រ ផ្សាយ​តាម​វិទ្យុ​ជាតិ​រៀងរាល់​ថ្ងៃ​សុក្រ។
  • គ.ស.​១៩៦៨ ទ្រង់​ទទួល​ឋានៈ​ជា​ប្រធាន​គណៈកម្មការ​ពិនិត្យ​អត្ថបទ​ផ្សាយ​ជា​រឿង​ខាង​ប្រវត្តិសាស្ត្រ​ខ្មែរ។
  • គ.ស.​១៩៦៩ ព្រះអង្គ​ទ្រង់​ទទួល​ការ​តែងតាំង​ជា​ប្រធាន​គណៈកម្មការ​ពិនិត្យ និង​កំណត់​អំពី​ន័យ​របស់​ទង់​ជាតិ​ខ្មែរ។

ព្រះ​កិច្ចការ​ដែល​​សម្ដេច​ទ្រង់​បាន​បំពេញ​ក្នុង​ព្រះពុទ្ធ​សាសនា​នៅ​បរទេស

  • នៅ​ព.ស.​២៤៧៥ គ.ស.​១៩៣១ សម្ដេច​ទ្រង់​បាន​ដឹកនាំ​គណៈ​ប្រតិភួ​នៃ​មន្ត្រី​សង្ឃ ទៅ​កាន់​ក្រុង​វៀងច័ន្ទន៍ និង​ក្រុង​ហ្លួង​ព្រះបាង ប្រទេស​លាវ ដើម្បី​រួបរួម​ក្នុង​ពិធី​សម្ពោធ​ពុទ្ធ​សាសន​បណ្ឌិត្យ​ប្រទេស​លាវ​ផង ដើម្បី​ជំនុំ​ពិភាក្សា​អំពី​ការ​សិក្សា​សម្រាប់​សាលា​បាលី​រង​នៅ​ប្រទេស​លាវ​ផង។
  • ព.ស.​២៤៧៧ គ.ស.​១៩៣៣ សម្ដេច​ទ្រង់​បាន​ដឹកនាំ​ គណៈ​ប្រតិភូ​ព្រះសង្ឃ​ខ្មែរ​ទៅ​ធ្វើ​ទស្សនាចរណ៍​ចំពោះ​វត្ត​ខ្មែរ​ទាំងឡាយ​ក្នុង​ដែន​កូសាំងស៊ីន កម្ពុជា​ក្រោម។
  • នៅ​ព.ស.​២៤៨៣ គ.ស.​១៩៣៩ សម្ដេច​ទ្រង់​បាន​ដឹកនាំ​គណៈ​ប្រតិភូ​មួយ​ទៅ​កាន់​ប្រទេស​លាវ​ម្ដង​ទៀត ដើម្បី​ប្រជុំ​ប្រឹក្សា​កិច្ចការ នៃ​ពុទ្ធ​សាសន​បណ្ឌិត្យ​ប្រទេស​លាវ និង​ការ​សិក្សា​សម្រាប់​សាលា​បាលី​នៅ​ប្រទេស​លាវ​ផង ដើម្បី​ជួយ​រំលឹក​ដាស់​តឿន​ប្រជាជាតិ​លាវ​ឲ្យ​មាន​ការ​សិក្សា​ព្រះ​បរិយត្តធម៌ និង​ការ​ប្រតិបត្តិ​ព្រះ​ពុទ្ធ​សាសនា ឲ្យ​ស្រប​គ្នា​តាម​របៀប​ការ​សិក្សា និង​ការ​ប្រតិបត្តិ​ព្រះ​ពុទ្ធ​សាសនា​នៃ​ប្រទេស​កម្ពុជា ទាំង​ប្រជាជាតិ​នៅ​ក្នុង​ទី​ប្រជុំជន និង​ក្នុង​ខេត្ត​នានា នៃ​ព្រះរាជាណាចក្រ​លាវ ខំ​ប្រឹង​យក​ចិត្ត​ទុក​ដាក់​ក្នុង​ការ​សិក្សា និង​ការ​ប្រតិបត្តិ​ឲ្យ​បាន​ត្រឹម​ត្រង់​គន្លង​ព្រះ​ពុទ្ធ​សាសនា​ផង។
  • ព.ស.​២៤៨៧ គ.ស.​១៩៤៣ សម្ដេច​ទ្រង់​បាន​ទទួល​នាទី​ជា​សមាជិក​ឆ្លើយឆ្លង​នៃ​សាលា​បារាំង​សែស​នៅ​ចុង​បូព៌ា​ប្រទេស ហើយ​នៅ​ព.ស.​២៤៩២ គ.ស.​១៩៤៨ សម្ដេច​បាន​ទ្រង់​ទទួល​នាទី​ជា​សមាជិក​កិត្តិយស​នៃ​សាលា​នេះ​ដរាប​មក។
  • ព.ស.​២៤៩៤ គ.ស.​១៩៥០ សម្ដេច​បាន​ទ្រង់​ដឹកនាំ​គណៈ​ប្រតិភូ​ខ្មែរ​នៅ​ប្រជុំ​សន្និសីទ​ដើម្បី​បង្កើត​ពុទ្ធិក​សមាគម​ពិភព​លោក​នៅ​ក្រុង​កោលម្បូ ប្រទេស​ស្រី​លង្កា​ទ្វីប។
  • នៅ​ព.ស.​២៤៩៧ គ.ស.​១៩៥៣ សម្ដេច​បាន​ទ្រង់​ដឹកនាំ​គណៈ​ប្រតិភូ​ខ្មែរ​ទៅ​បំពេញ​បេសកកម្ម​សុឆន្ទៈ​ប្រឹក្សា​សម្រេច​រឿង​ឆដ្ឋសង្គាយនា នៅ​ក្រុង​រង្គូន សហភាព​ភូមា។
  • ក្នុង​ឆ្នាំ​ជា​បន្ទាប់​នៅ​ព.ស.​២៤៩៨ គ.ស.​១៩៥៤ សម្ដេច​បាន​ទ្រង់​ដឹកនាំ​គណៈ​ប្រតិភូ​ខ្មែរ​និមន្ត​នៅ​កាន់​​ក្រុង​រង្គូន ប្រទេស​ភូមា​ម្ដង​ទៀត ដើម្បី​រួបរួម​ក្នុង​ការ​ប្រជុំ​ធ្វើ​ឆដ្ឋសង្គាយនា​សម័យ​ប្រជុំ​ដំបូង។
  • កន្លង​មួយ​ឆ្នាំ​ក្រោយ​មក ព.ស.​២៤៩៩ គ.ស.​១៩៥៥ សម្ដេច​ទ្រង់​បាន​ដឹកនាំ​គណៈ​ប្រតិភូ​ខ្មែរ​ទៅ​កាន់​ទី​ឆដ្ឋសង្គាយ នៅ​ក្រុង​រង្គូន ប្រទេស​ភូមា ជា​លើក​ទី​បី​ដើម្បី​ប្រជុំ ហើយ​បិទ​សម័យ​ប្រជុំ​ប្រចាំ​ឆ្នាំ។
  • នៅ​ព.ស.​២៥០៣ គ.ស.​១៩៥៩ សម្ដេច​ទ្រង់​បាន​ដឹកនាំ​គណៈ​ប្រតិភូ​ខ្មែរ​ទៅ​កាន់​ក្រុង​ជកត៌ា និង​ក្រុង​សឹម៉ារ៉ាំង កោះ​ជ្វា ប្រទេស​ឥណ្ឌូណេស៊ី ដើម្បី​ចូលរួម​ក្នុង​ពិធី​បុណ្យ​វិសាខ​បូជា។
  • ព.ស.​២៥០៣ ចូលរួម​ពិធី​បញ្ចុះ​ខណ្ឌ​សីមា និង​ពិធី​សន្មត​រោង​ឧបោសថ ព្រម​ទាំង​ជា​ព្រះ​ឧបជ្ឈាយ៍​បំបួស​កុល​បុត្រ អ្នក​ប្រទេស​នោះ​ចំនួន​បី​រូប​ផង។

៨. សមណសក្ដិ​បរិច្ឆេទ (កំណត់​អំពី​សមណស័ក្តិ)

ដោយ​ព្រះមហា​វិរិយភាព​របស់​សម្ដេច ដែល​ទ្រង់​បាន​បំពេញ​ទាំង​ផ្លូវ​ព្រះ​ពុទ្ធ​សាសនា ទាំង​ផ្លូវ​លោក​ដែល​យើង​បាន​ឃើញ​ជា​ភស្តុតាង សម្ដេច​ក៏​បាន​ឡើង​សមណស័ក្តិ​ជា​លំដាប់លំដោយ ដូច​តទៅ​នេះ​គឺ៖

  • ព.ស.​២៤៥៤ គ.ស.​១៩១០ សម្ដេច​បាន​ទទួល​ការ​តែងតាំង​ក្នុង​សមណស័ក្តិ ជា​ព្រះ​បាឡាត់​សាក្យបុត្តិយ៍ (បាឡាត់​របស់​ព្រះ​សក្យវង្ស នុត វត្ត​ឧណ្ណាលោម)។
  • ព.ស.​២៤៥៦ គ.ស.​១៩១២ សម្ដេច​បាន​ទទួល​សមណស័ក្តិ​ជា​ព្រះ​គ្រូ​សង្ឃ​សត្ថា (ទី​ឋានានុក្រម សម្រាប់​ថ្នាក់​ឯក​របស់​សម្ដេច​ព្រះសង្ឃ​រាជ​ព្រះនាម​ និល ទៀង)។
  • ព.ស.​២៤៧៥ គ.ស.​១៩៣១ សម្ដេច​បាន​ឡើង​សមណស័ក្តិ​ជា​ព្រះ​សាសនសោភ័ណ (រាជាគណៈ​កិត្តិយស)។
  • ព.ស.​២៤៨៤ គ.ស.​១៩៤០ សម្ដេច​បាន​ឡើង​សមណស័ក្តិ​ជា​ព្រះពុទ្ធ​ឃោសាចារ្យ (រាជាគណៈ​ថ្នាក់​ទី​២)។
  • ព.ស.​២៤៨៨ គ.ស.​១៩៤៤ សម្ដេច​បាន​ឡើង​ជា​សមណស័ក្តិ​ជា​ព្រះពោធិវ័ង្ស (រាជា​គណៈ​ថ្នាក់​ទី​១)។
  • ព.ស.​២៤៩២ គ.ស.​១៩៤៨ សម្ដេច​បាន​ឡើង​សមណស័ក្តិ​ខ្ពស់​បំផុត​ជា​ព្រះមហាសុមេធាធិបតី សង្ឃនាយក គណៈមហានិកាយ។
  • ព.ស.​២៤៩៤ គ.ស.​១៩៥០ ព្រះករុណា​ជា​អម្ចាស់​ជីវិត​ទ្រង់​បាន​ប្រោស​ប្រទាន​ប្រគេន​ព្រះ​ឋានៈ​ជា​សម្ដេច​ព្រះ​មហាសុមេធាធិបតី សង្ឃនាយក​គណៈ​មហានិកាយ។
  • លុះ​ដល់​មក​ព.ស.​២៤៩៨ គ.ស.​១៩៥៤ រដ្ឋាភិបាល​សហភាព​ភូមា​បាន​ប្រគេន​ព្រះ​ឋានៈ​សម្ដេច​ជា ព្រះ​អគ្គ​មហា​បណ្ឌិត​សហភាព​ភូមា។
  • ស្រាប់​តែ​ដល់​មក​ព.ស.​២៥០១ គ.ស.​១៩៥៧ រដ្ឋាភិបាល​សហភាព​ភូមា បាន​សូម​តម្លើង​ព្រះ​ឋានៈ​សម្ដេច​ជា ព្រះ​អភិធជៈ​មហារដ្ឋ​គរុ នៃ​សហភាព​ភូមា​ទៀត ដែល​ជា​សមណស័ក្តិ​ដ៏​ខ្ពស់​បំផុត​មាន​តែ​មួយ​អង្គ​ក្នុង​សហភាព​ភូមា។
  • ខែ​កុម្ភៈ គ.ស.​១៩៦៤ អ្នក​និពន្ធ​ខ្មែរ​ទាំង​អស់​បាន​ថ្វាយ​ព្រះឋានៈ​ព្រះអង្គ​ជា ព្រះអគ្គ​និពន្ធ​អក្សរសាស្ត្រ​ខ្មែរ និង​ជា​សមាជិក​កិត្តិយស​នៃ​សមាគម​អ្នក​និពន្ធ​ខ្មែរ​ផង។
  • ព.ស.​២៥០៧ គ.ស.​១៩៦៣ សម្ដេច​ព្រះ នរោត្ដម សីហនុ ព្រះ​ប្រមុខ​រដ្ឋ​នៃ​ប្រទេស​កម្ពុជា ទ្រង់​បាន​ប្រោស​ប្រទាន​ព្រះ​ឋានៈ​សម្ដេច​ជា សម្ដេច​ព្រះសង្ឃរាជ​ថ្នាក់​ទី​១។
  • ថ្ងៃ​ទី​២៨ ឧសភា ១៩៦៧ ទ្រង់​បាន​ទទួល​សញ្ញាប័ត្រ​បណ្ឌិត​អក្សរសាស្ត្រ ពេញ​លក្ខណៈ​អំពី​សម្ដេច​ព្រះ​ប្រមុខ​រដ្ឋ​ក្នុង​នាម​មហាវិទ្យាល័យ​អក្សរសាស្ត្រ និង​មនុសាស្ត្រ នៃ​ភូមិន្ទ​សកល​វិទ្យាល័យ។

៩. ឥស្សរិយ​បរិច្ឆេទ (កំណត់​អំពី​ឥស្សរិយយស)

គ្រឿង​ឥស្សរិយយស​ដែល​សម្ដេច​បាន​ទទួល​មាន​ដូច​តទៅ​នេះ គឺ៖

  • – មេដាយ​អស្សឫទ្ធិ​មុនីសារភរណ៍ នៅ​ព.ស.​២៤៦១ គ.ស.​១៩១៧។
  • – មេដាយ​អស្សឫទ្ធិ​ព្រះរាជាណាចក្រ​កម្ពុជា នៅ​ព.ស.​២៤៦៧ គ.ស.​១៩៣២។
  • – មេដាយ​អស្សឫទ្ធិ​ដំរី​មួយ​លាន និង​ស្វេតច្ឆត្រ ប្រទេស​លាវ នៅ​ព.ស.​២៤៧៦ គ.ស.​១៩៣២។
  • – មេដាយ​សេនា​នៃ​បណ្ឌិត​សភា សាធារណរដ្ឋ​បារាំង នៅ​ព.ស.​២៤៨១ គ.ស.​១៩៣៧។
  • – មេដាយ​អស្សឫទ្ធិ​ដឹឡាឡេស្យុង​ដូណ្ណើរ នៃ​សាធារណរដ្ឋ​បារាំង នៅ​ព.ស.​២៤៨៦ គ.ស.​១៩៤២។
  • – មេដាយ​សេនា នៃ​ព្រះរាជាណាចក្រ​កម្ពុជា នៅ​ព.ស.​២៤៨៨ គ.ស.​១៩៤៤។
  • – មេដាយ​សេនាដឹឡាឡេស្យុង​ដូណ្ណើរ នៃ​សាធារណរដ្ឋ​បារាំង នៅ​ព.ស.​២៤៩២ គ.ស.​១៩៤៨។
  • – មេដាយ​មហា​សិរីវឌ្ឍន៍ ព្រះរាជាណាចក្រ​កម្ពុជា នៅ​ព.ស.​២៥០៥ គ.ស.​១៩៦២។
  • – មេដាយ​មហា​សិរីវឌ្ឍ​សុវត្ថារា នៅ​ព.ស.​២៥០៦ គ.ស.​១៩៦៣។
  • – មេដាយ​ជាតូបការ ដែល​ជា​គ្រឿង​ឥស្សរិយយស​ធំ​បំផុត ក្នុង​ព្រះរាជាណាចក្រ​កម្ពុជា នៅ​ព.ស.​២៥១៣ គ.ស.​១៩៦៩។

ត​ទៅ​លេខ​ទី​៤